Journal Alissar – اليسار

ثائرة-بنّاءة-حرة

جدد شبابك

without comments

ألله عطاها وزاد بانصافها
بيحسنها و تكوينها ما لها نظير
ان جيت احكي و قول بي أوصافها
بخاف تقولولي هيك زودتا كثير
حن القمر ليها و نجومو عافها
منّو ترك قبلة على جبينا المنير
شعرها شلّال خلف كتافها
بتقول غزل الشمس هالشعر الحرير
قلبي خفق لما بعيوني شافها
وقالي هواها صار ع قلبك أمير
غمضت عينيي ت احجب طيفها
بلحظة ع صدري غارت بنسمة عبير
و ذاب قلبي بيهواها ولطفها
وقللي بعد ما كبرت راح نرجع زغير
جدد شبابك تا تصير بصفها
مهما طول هالعمر بيظلو قصير
قلت لسانات الناس صرت بخافها
شوف شعري شاب و بعمري كبير
قال شعرك شاب فكرة تافهة
و ع الختيرة يا صاحبي بكير
لو قامتك غطى الشيب و لفها
ما بشيب بيصدرك ولا يمكن تصير
قلت خللي الناس تضرب دفها
وترقص ع دق طبول و مزامير
شو عليي ان صار كفي بكفها
والقلب لاقى القلب بيمشهد مثير
قصة طويلة دون ذكر مطافها
رح قلكن و بظل مرتاح الضمير
لو حوموا النحلات حول شفافها
أحلا عسل منشيل من قلب القفير…….رجا

Written by Raja Mallak

September 22nd, 2017 at 3:49 pm

Posted in Thoughtsِ

Leave a Reply